In tel tempo che Moisè, de sestiere Castèo, jera drio portar pai pascoi e piegore de Ietro che gera so pare de so mujere, travarsò el deserto, e rivò aea montagna del padreterno, che se ciamava Oreb. Ea montagna, no el padreterno.
Un agnoeo del padreterno se jera sconto in te un rovaro che brusava. Dirà i posteri che un rovaro no saria propio el mejo posto pa sconderse, e un rovaro che brusa po gnanca pa manco, ma un agnoeo xe sempre un agnoeo, e no ga tutti sti problemi de soferense e de incomodi che gà avuo i omeni da quando el padreterno, nea so sapiensa, i gà mandà a peadoni fora de l'eden.
Moisè vardò sbainà el rovaro: no ghe credarè, ma sto ostrega de brecano el brusava ma no se consumava, no faxea bronsa nè falive. E Moisè penso: "ghesbò! ghe ndarò da rente a vardar megio sta maravegia: come xè che sto grebano no el se consuma?" El padreterno, che gavea moeà el poro agnoeo a rostirse in tel rovaro, se incorse che Moisè se gera incuriosìo, e ghe criò da drento el brecano: "Ou ti, Moisè!"
E lu indrio "Ti e i ta morti cani, cossa nasse?"
E el padreterno, notoriamente de teraferma, ghe ga dito: "Fermo là, venexian de merda! Sempre co sta fregoea de ndar a rompare i santissimi in tèra de staltri! E cavite chee scarpasse onfegae, che a tera che te ghè soto i pie ea xe santa!" E sensa gnanca ea bonagrassia de spetar che Moisè finisse de cavarse i socoi e podesse domandarghe gnente, ghe dise: "Mi so el padreterno, de to pare, del pare de to pare e de tuti i to avi". E Moisè se butò el manteo suea testa, che no gaveva massa corajo de vardare el padreterno nei occi, anche se xe sta na roba un fià da mona parchè, a rigor de logica, gavarìa vardà un rovaro che brusava, o a farla granda, un agnoeo un fià sfigà che se rostiva drento el deto rovaro, ma, cossa vuìo farghe, el toso jera venexian e casteanoto, quindi miga massa intijente.
El padreterno iddio ghe ga dito: "Go oservà ea me zente in Egito, i criava e i se lagnava cussì forte che me gà descantà, mi che jero drio farme un sonéto. Insoma zà che jero svejo go oservà e soferense che i pativa. So vegnùo zo del leto, eora, zà che so in piè, i libarerò dal poder de Tebe ladrona, e i farò ndar in una terà bea granda e spassiosa, piena de pianure, dove che late e miee i core pai campi come aqua dei fossi. Ma no sta credere tì che ghè sarì soeo che vialtri. Ghe sarà Cananei, Itìti, Amorei e una manega de altra zente che vialtri leghisti ciamarì clandistini, che i clandistini in sta terà sarì vialtri, cussì imparè puito. Ciapa."
E Moisè eo gà inondà de domande "Ciò vecio, chi sarìa mi par andar dal faraone a romperghe i ovi, e tirar fora tuti i ebrei de l'Egito? Queo el me verxe come una canocia! E poi se vago dai ebrei e ghe digo che el padreterno el me gà dixesto tute ste robe, quei me ciapa par mato e i me manda ai mati de san servolo! E i me domandarà come che te te ciami, e ti no te gà avesto ea bonagrassia de dirmeo, e gavarò da inventarme qualche monada! E po no so gnanca massa bon de parlare, ghesboro mi, co sta ere no se capisse un casso de queo che digo!"
"Eora andè tuti in mona, tuti quanti e anca ti, Moisè, e chea vaca de to santoea!"
El padreterno, incassà nero, ciapò su el so agnoeo rosto e tornò in cieo a farse un soneto, e a spetare che nassesse un Moisè ebreo che eo scoltasse un fià de più.
Nessun commento:
Posta un commento